လေးငယ်တစ်ဦး နာရေးမှာ ပါလက်စတိုင်းနဲ့ အစ္စရေးစစ်သားတွေ ထိပ်တိုက်တွေ့မှုတွေ ဖြစ်ပွား သိမ်းပိုက်ခံ အနောက်ဖက်ကမ်းမှာ အရင်ရက်က အသတ်ခံရတဲ့ ပါလက်စတိုင်း ယောက်ကျားလေးတစ်ဦးရဲ့ နာရေးမှာ အစ္စရေးစစ်သားတွေနဲ့ ပါလက်စတိုင်းတွေကြား ကြာသပတေးနေ့က ထိပ်တိုက်တွေ့မှုတွေ ဖြစ်ပွားပေါ်ပေါက်တယ်လို့ အေအက်ဖ်ပီသတင်းထောက်က သတင်းပေးပို့ပါတယ်။ ဟီဘရွန်းမြို့က အနောက်မြောက်ဖက် အနောက်ဖက်ကမ်း ဘိုက်အူးမားမြို့မှာ ဖခင်ဖြစ်သူနဲ့အတူ ကားမောင်း ခရီးသွားနေတဲ့ အသက် ၁၂ အရွယ် မိုဟာမတ်အယ်အယ်လာမီဟာ အစ္စရေးစစ်သားတွေ ပစ်ခတ်လို့ ဗုဒ္ဓဟူးနေ့မှာ သေဆုံးခဲ့ရတာဖြစ်ကြောင်း ပါလက်စတိုင်းအာဏာပိုင်တွေက ပြောပါတယ်။ ကြာသပတေးနေ့မှာတော့ ဒီ ကလေးငယ်အလောင်းကို ပါလက်စတိုင်း သမ္မတ မာမွတ်အဘတ်စ်ပါတီ Fatah ပါတီရဲ့ အလံလွှမ်းခြုံပြီး ဘိုက်အူးမားမြို့လမ်းတွေတစ်လျှောက် စီတန်းလှည့်လည်ပြီး မြေမြုပ်သင်္ဂြိုလ်ခဲ့ပါတယ်။ ဒီနောက်မှာ ပါလက်စတိုင်းရာပေါင်းများစွာဟာ အစ္စရေးစစ်သားတွေဆီ ခဲတွေနဲ့ ပစ်ပေါက်လာကြပြီး အစ္စရေးစစ်သားတွေက မျက်ရည်ယိုဓာတ်ငွေ့တွေနဲ့ တုံ့ပြန်ပစ်ခတ်ကြောင်း အေအက်ဖ်ပီသတင်းထောက်တစ်ဦးက ပြောပါတယ်။ အစ္စရေးစစ်တပ်က ထုတ်ပြန်ချက်မှာ ဗုဒ္ဓဟူးနေ့က ဘိုက်အူးမား စစ်ဆေးရေးဂိတ်အနီးမှာ ကားတစ်စီးထဲက ထွက်လာကြတဲ့ အမျိုးသားတွေဟာ မြေကြီးကို တူးဆွကြပြီး ထွက်ခွာသွားတာကို သိရှိသတိထားမိကြောင်း ဖော်ပြပါတယ်။ အဲဒီ ဧရိယာတစ်ဝိုက်ကို စစ်ဆေးရာမှာ အိတ်နှစ်အိတ် တွေ့ရှိပြီး တစ်အိတ်က မွေးကင်းစကလေးငယ် ရုပ်အလောင်း ထည့်ထားတာကို တွေ့ရှိတယ်လို့ အစ္စရေးစစ်တပ် ထုတ်ပြန်ချက်က ဆိုပါတယ်။ နောက်ပိုင်းမှာ အဲဒီ ကားကို စစ်သားတွေက ထပ်တွေ့ရတာကြောင့် စံချိန်စံညွှန်း လုပ်ထုံးတွေနဲ့အညီ ကားကို ရပ်ခိုင်းဖို့ ကြိုးစားပြီး အော်ဟစ်ရပ်ခိုင်းတာ၊ မိုးပေါ် သေနတ်ထောင်ပစ် သတိပေးတာတွေ လုပ်ဆောင်ခဲ့တယ်လို့ ဆိုပါတယ်။ “အဲဒီ ကားက မရပ်တာကြောင့် စစ်သားတစ်ဦးက ကားရပ်သွားအောင် ဘီးတွေဆီ လှမ်းပစ်ခဲ့တာ ဖြစ်တယ်”လို့ စစ်တပ်က ပြောပါတယ်။ “ဒီ ပစ်ခတ်မှုမှာ ပါလက်စတိုင်း ယောက်ကျားလေးငယ် သေဆုံးရပါတယ်ဆိုတဲ့ အတည်ပြုပြောဆိုချက်ကို ကျွန်တော်တို့ စုံစမ်းစစ်ဆေးနေပါတယ်”လို့ ထုတ်ပြန်ချက်မှာ ဖော်ပြပြီး ဒီ ဖြစ်ရပ်ကို အကြီးတန်း ကွပ်ကဲရေးအရာရှိတွေက ပြန်လည်သုံးသပ်နေတယ်လို့ ဖြည့်စွက်ဆိုထားပါတယ်။ အယ်လာမီဟာ ရက်ပိုင်းအတွင်းမှာ အစ္စရေးက ပစ်ခတ်လို့ သေဆုံးရတဲ့ ဒုတိယမြောက် ပါလက်စတိုင်း ငယ်ရွယ်သူတစ်ဦးဖြစ်ပြီး ပြီးခဲ့တဲ့ စနေနေ့က မိုဟမတ်တာမီမီဆိုသူ အသက် ၁၇ နှစ်အရွယ် လူငယ်တစ်ဦး သေနတ်ထိမှန်ပြီး သေဆုံးထားခဲ့တာလည်း ဖြစ်ပါတယ်။

 

အစ္စ‌ရေးအကျဥ်းထောင်ကနေ ပါလက်စတိုင်း ၆ ဦး လိုဏ်ခေါင်းတူးပြီး ထွက်ပြေးလွတ်မြောက် အစ္စရေးနိုင်ငံရဲ့ အကျဥ်းထောင်တစ်ခုကနေ ပါလက်စတိုင်း ခြောက်ဦး လိုဏ်ခေါင်းတူးပြီး စက်တင်ဘာ ၆ ရက်မှာ ထွက်ပြေးလွတ်မြောက်သွားတယ်လို့ သိရပါတယ်။ လူသိများတဲ့ စစ်‌သွေးကြွတစ်ဦး အပါအဝင် အဆိုပါ ထွက်ပြေးလွတ်မြောက်သွားသူ ခြောက်ဦးဟာ အကျဥ်းထောင်တွင်း လက်ဆေးကန်တစ်ခုရဲ့ အောက်ခြေမှာ လိုဏ်ခေါင်းတစ်ခု တူးပြီးတော့ ထွက်ပြေးသွားခဲ့တာဖြစ်ပြီး ၎င်းတို့ကို အစ္စရေးတာဝန်ရှိသူတွေက လိုက်လံရှာဖွေနေပါတယ်။ နိုင်ငံ မြောက်ပိုင်း ဂီလ်ဘိုအာ အကျဥ်းထောင်အပြင်ဘက်မှာ “မသင်္ကာဖွယ် လူတွေ” ကို ဒေသခံတွေက တွေ့ရှိခဲ့ပြီးနောက် မနက် ၃ နာရီလောက်မှာ သတိပေးချက် ထုတ်ခဲ့ရတာဖြစ်ကြောင်း အစ္စရေး အကျဥ်းထောင် ဦးစီးဌာန (IPS) က ပြောပါတယ်။ အကျဥ်းထောင်ကနေ ထွက်ပြေးလွတ်မြောက်သွားသူတွေထဲမှာ သိမ်းပိုက်ခံ အနောက်ဘက်ကမ်းရှိ ဂျီနင်မြို့က လူသိများတဲ့ စစ်သွေးကြွ ခေါင်းဆောင်ဟောင်းတစ်ဦးဖြစ်တဲ့ ဇာကာရီရာ ဇူဘေဒီလည်း ပါဝင်တယ်လို့ IPS က ပြောပါတယ်။ ရှာဖွေမှုမှာတော့ ရဲ၊ စစ်တပ်နဲ့ အစ္စရေး ပြည်တွင်းလုံခြုံရေး အေဂျင်စီရဲ့ အေးဂျင့်တွေ ပူးပေါင်းပြီး ရှာဖွေနေတယ်လို့ တာဝန်ရှိသူတွေက ပြောပါတယ်။ ဂီလ်ဘိုအာ အနီးဝန်းကျင် ဧရိယာမှာ အနံ့ခံ ခွေးတွေ ဖြန့်ကျက်ထားပြီး စစ်ဆေးရေးဂိတ်တွေ ထားရှိထားတယ်လို့ သိရပါတယ်။ IPS က ထုတ်ပြန်ဖော်ပြခဲ့တဲ့ ဗီဒီယိုထဲမှာ အစ္စရေးတာဝန်ရှိသူတွေက အကျဥ်းထောင်တွင်း လက်ဆေးကန်တစ်ခုအောက် မြေအောက်ထဲ တူးထားတဲ့ ကျဥ်းမြောင်းတဲ့ လိုဏ်ခေါင်းတစ်ခုကို စစ်ဆေးနေတာကို မြင်တွေ့ခဲ့ရပြီး ယင်းရုပ်သံဗီဒီယိုကတော့ အထင်ကရ ၁၉၉၄ အကျဥ်းထောင်ဖောက်ဇာတ်ကား “The Shawshank Redemption” ကိုတောင် ပြန်ပြောင်းအမှတ်ရစေခဲ့ပါတယ်ရှာဖွေရေးရဲ့ တစိတ်တဒေသအနေနဲ့ အစ္စရေးစစ်တပ်ရဲ့ တပ်ဖွဲ့ဝင်တွေကို အနောက်ဘက်ကမ်းမှာ တပ်ဖြန့် ပြင်ဆင်ထားတယ်လို့လည်း သိရပါတယ်။