တီဟီရန်က နေရာတခု တိုက်ခိုက်ခံရမှု
အီရန်နဲ့ အစ္စရေးတို့ ကြား အပြန်အလှန်တိုက်ခိုက်မှုတွေက ဆက်ရှိနေပါတယ်။ အမေရိကန်သမ္မတ ဒေါ်နယ်ထရမ့်ကတော့ "ကျွန်တော်တို့ပါဝင်နိုင်သလို၊ မပါဝင်နိုင်တာလည်း ဖြစ်နိုင်တယ်" လို့ လက်ရှိတိုက်ခိုက်မှုတွေနဲ့ ပတ်သက်ပြီး အမေရိကန်ပါဝင်မလားဆိုတဲ့ မေးခွန်းကို ပြန်ဖြေထားပါတယ်။
အီရန်နဲ့ အစ္စရေးတို့ ကြား ဘာတွေဖြစ်နေလဲ ဆိုတာနဲ့ တကယ်လို့ စစ်ပွဲကအရှိန်မြှင့်လာရင် ဘာတွေဖြစ်လာနိုင်လဲဆိုတဲ့ မေးခွန်းတွေကို ဘီဘီစီက ကျွမ်းကျင်သူတွေနဲ့ သတင်းထောက်တွေကဖြေကြားထားပါတယ်။
ဘာကြောင့် အစ္စရေးက အီရန်ကို ဗုံးကြဲရတာလဲ
လက်ရှိဖြစ်နေတဲ့ အခင်းအကျင်းအရဆိုရင် အစ္စရေးမှာ တခြားရွေးချယ်စရာအခြေအနေမရှိတဲ့ ပုံစံကိုမြင်ရပါတယ်။ ပြီးခဲ့တဲ့ လအနည်းငယ်အတွင်းက အီရန်က သူ့ရဲ့ နျူကလီးယားစီမံကိန်းနဲ့ လက်နက်တွေကို အင်အားတိုးတည်ဆောက်ဖို့ အရှိန်မြှင့်ခဲ့တယ်လို့ အစ္စရေးက ယုံကြည်နေပါတယ်။
အီရန်ရဲ့ နျူကလီးယားအစီအစဥ်ကို ထိန်းချုပ်နိုင်တဲ့ ဆွေးနွေးမှုမျိုး ရှိမနေခြင်းကြောင့်လည်း အခုလိုတိုက်ခိုက်မှုကို တဖန်ရွေးချယ်ခဲ့ရတာမျိုးလို့ တုံ့ပြန်ထားပါတယ်။
နျူကလီးယားလက်နက်ကို ပိုင်ဆိုင်ပြီဆိုရင် အဲဒါကိုသုံးပြီး အစ္စရေးကိုဖျက်ဆီးမယ်ဆိုတဲ့ သန္နိဋ္ဌာန်ချထားတာကြောင့် အီရန်ဟာ အစ္စရေးရဲ့ အသက်ရှင်ရပ်တည်မှုကိုခြိမ်းခြောက်နေတယ်လို့ အစ္စရေးကရှု မြင်ထားတာပါ။
